“በሁርሶ የወሰድኩት የወታደራዊ ሳይንስ ሥልጠና የአመራር ብቃትን  ያሳድጋል”- ዶ/ር ጌዲዮን ጢሞቲዎስ

የኢትዮጵያ የውጭ ጉዳይ ሚኒስትር ዶ/ር ጌዲዮን ጢሞቲዎስ በሁርሶ ዕጩ መኮንኖች ማሠልጠኛ ትምህርት ቤት የወሰዱት የወታደራዊ ሳይንስ ሥልጠና የአመራርነት ብቃታቸውን ለማሳደግና ስለ ሀገራዊ ደኅንነት ያላቸውን ግንዛቤ ለማስፋት እንደሚረዳ ገለጹ። ሚኒስትሩ በጥቅምት 26 ቀን 2019 ዓ.ም በመከላከያ ሠራዊት ይፋዊ ዘገባ ላይ እንደተገለጸው፣ ሥልጠናው ወታደራዊ ሳይንስን በተግባር ለመረዳት፣ የሠራዊቱን የሥራ ሂደትና የሥልጠና ሥርዓት በቅርበት ለመገንዘብ እንዲሁም በአካላዊ፣ በአእምሯዊና በተግባር ዝግጁነት ረገድ አዲስ አቅም ለመጨበጥ እንዳስቻላቸው ተናግረዋል። ዶ/ር ጌዲዮን ኢትዮጵያ አስተማማኝ የመከላከያ አደረጃጀትና አወቃቀር እንድትገነባ የወታደራዊ ሳይንስን ማወቅ አስፈላጊ መሆኑን ጠቅሰው፣ ያገኙት ተሞክሮ በአመራር ሥራቸው የተሻለ ግንዛቤና ዝግጁነት እንዲኖራቸው እንደሚያግዝ ገልጸዋል። ሥልጠናው ለሲቪል አመራሮች ስለ ወታደራዊ አስተሳሰብ፣ ስለ መከላከያ ሥርዓት፣ ስለ ሀገራዊ ደኅንነትና ስለ ስትራቴጂካዊ ውሳኔ አሰጣጥ ያላቸውን ግንዛቤ ለማስፋት ጠቃሚ መሠረት እንደፈጠረ ተገልጿል። በተለይም የተግባቦት ክፍተትን ማጥበብ፣ የጋራ ግንዛቤን ማሳደግ፣ የውሳኔ አሰጣጥን ማሻሻልና በተቋማት መካከል የተቀናጀ ምላሽ የመስጠት አቅምን ማጠናከር ከሥልጠናው ጠቀሜታዎች መካከል እንደሚገኙ ተነግሯል።