ሳውዲ አረቢያ ከኢትዮጵያ የሚደረገውን የቤት ሠራተኞች ቅጥር አለመሰረዟን ገለጸች

የሳውዲ አረቢያ የሰው ኃይል እና ማኅበራዊ ልማት ሚኒስቴር ከኢትዮጵያ የሚደረገውን የቤት ሠራተኞች ቅጥር ውል ሙሉ በሙሉ ሰርዟል ተብሎ የሚናፈሰውን ወሬ ማስተባበሉን ሳውዲ ጋዜጣ ዘግቧል።   ሚኒስቴሩ፤ በሙሳነድ የዲጂታል መድረክ በኩል የሚደረገው የቅጥር ሒደት መቋረጡንና ይህም ከ30 በመቶ የዋጋ ጭማሪ ጋር የተያያዘ ነው ተብሎ የተሰራጨው መረጃ ሐሰት መሆኑን አመልክቷል።   ሚኒስቴሩ እንዳብራራው፤ በውጭ አገር ያሉ የተወሰኑ የሠራተኛ አቅራቢ ኤጀንሲዎች ውላቸውን መወጣት ባለመቻላቸው ምክንያት በቁጥር ጥቂት የሆኑና የተጓተቱ ውሎች ብቻ እንዲሰረዙ የተደረገ ሲሆን፣ ይህም የደንበኞችን መብትና የአገልግሎቱን ጥራት ለመጠበቅ የተወሰደ ሕጋዊ እርምጃ ነው።   ከኢትዮጵያ የሚደረገው የቤት ሠራተኞች ቅጥር አገልግሎት አስቀድሞ በተቀመጠውና በጸደቀው የዋጋ ተመን መሠረት አሁንም በሥራ ላይ እንደሚገኝ ተገልጿል።