አንድ የእስራኤል ባለሀብት አዲስ አበባ በሚገኝ ምግብ ቤት ውስጥ ሞተው ተገኙ!!

አንድ የእስራኤል ባለሀብት አዲስ አበባ በሚገኝ አንድ ምግብ ቤት የመጸዳጃ ቤት ውስጥ ረቡዕ ጥቅምት 18 ቀን ሞተው መገኘታቸውን የእስራኤል መገናኛ ብዙኃን ዘግበዋል። የኢትዮጵያ ፖሊስ ከክስተቱ ጋር በተያያዘ ተጠርጣሪዎችን በቁጥጥር ሥር አውሎ የምርመራ ሥራውን ቀጥሏል። በተወሰኑ ዘገባዎች "ራዳ" ተብለው የተጠቀሱት እኚሁ ግለሰብ ለንግድ ሥራ ወደ ኢትዮጵያ መጥተው እንደነበርና ወደ መጸዳጃ ቤት ከገቡ በኋላ ለ40 ደቂቃዎች ያህል ሳይመለሱ በመቅረታቸው፣ በቦታው የነበሩ ሰዎች ተከታትለው ሲፈልጓቸው በሽንት ቤት ክፍል ውስጥ ሕይወታቸው አልፎ መገኘቱ ተገልጿል። ምንም እንኳን የሞታቸው መንስኤ እስካሁን በይፋ ባይረጋገጥም፣ ባለሥልጣናት በመርዝ ተመረዘው ሊሆን ይችላል የሚለውን ግምት ጨምሮ ጉዳዩን በመመርመር ላይ ይገኛሉ። የአስከሬን ምርመራ (Autopsy) ውጤት ለሞታቸው ምክንያት የሆኑ ሁኔታዎችን በትክክል ለማወቅ ይረዳል ተብሎ ይጠበቃል። የእስራኤል የውጭ ጉዳይ ሚኒስቴር እና በአዲስ አበባ የሚገኘው የአገሪቱ ኤምባሲ፣ የአስክሬን ሽኝት ተፈጽሞ ወደ እስራኤል እንዲመለስና ሥርዓተ ቀብራቸው እንዲፈጸም ከኢትዮጵያ ባለሥልጣናት እና ከሟች ቤተሰቦች ጋር በትብብር እየሠሩ ይገኛሉ። ሚኒስቴሩ ለሟች ቤተሰቦችና ወዳጅ ዘመዶች የተሰማውን ጥልቅ ሐዘን ገልጿል።