የትግራይ ባለአደራ አስተዳደር የሰራተኞች ደመወዝ መክፈል ሊጀምር መሆኑን አስታወቀ

የትግራይ ክልል ባለአደራ አስተዳደር በክልሉ የሚገኙ የመንግሥት ሰራተኞች ያልተከፈላቸው ደመወዝ በቅርቡ መክፈል እንደሚጀምር አሳወቀ። የአስተዳደሩ የፖለቲካና ሕዝብ አደረጃጀት ዋና አስፈጻሚ አቶ ረዳኢ ኃለፎም፣ የመንግሥታዊ አገልግሎቶችን መጀመር እና ሲቪል ሰርቪሱን ወደ ሥራ ማስገባት የሚያስችሉ ዝግጅቶች መጠናቀቃቸውን ገልጸዋል። አቶ ረዳኢ እንደገለጹት፣ የሲቪል ሰርቪስ ሰራተኞች ወደ ሥራ ቦታቸው በመመለስ ሥራቸውን እንዲጀምሩ መመሪያ ተላልፏል። የሰራተኞች የሥራ ሁኔታና አስፈላጊ ጉዳዮች በጥናት ተለይተው መጠናቀቃቸውንም ጠቁመዋል። የተጠራቀመ ደመወዝ መኖሩን ያመለከቱት አቶ ረዳኢ፣ ሰራተኞች ወደ ሥራ ከገቡ በኋላ በቀናት ውስጥ ክፍያውን ለመጀመር ዝግጅት መደረጉን ተናግረዋል። ይህም በክልሉ የመንግሥት ሥራና አገልግሎቶችን ወደ መደበኛ ሂደት ለመመለስ ከሚደረጉ እርምጃዎች አንዱ መሆኑ ተገልጿል።