የኬንያ ቀይ መስቀል ከሞያሌ ግጭት ለተፈናቀሉ ዜጎች የአስቸኳይ ጊዜ እርዳታ ማከፋፈል ጀመረ

የእርዳታ አቅርቦት፦ በኢትዮጵያ በኩል ባለው የሞያሌ ድንበር ከተማ በተቀሰቀሰው ግጭት ሳቢያ ሕይወታቸውን ለማዳን ወደ ኬንያ ማርሳቢት ካውንቲ የተሻገሩ ተፈናቃይ ቤተሰቦች የኬንያ ቀይ መስቀል ማህበር (KRCS) የአስቸኳይ ጊዜ እርዳታ መስጠት መጀመሩን አስታውቋል። የድርጅቱ ዋና ጸሐፊ ዶክተር አህመድ እድሪስ «ቅድሚያ የምንሰጠው ወደ ሞያሌ የሚገቡ እያንዳንዱ ቤተሰቦች ደህንነታቸው የተጠበቀ፣ መጠለያ ያገኙ እና በክብር የተስተናገዱ መሆናቸውን ማረጋገጥ ነው» ማለታቸው ተመላክቷል። በቦታው ያሉት የድርጅቱ ሠራተኞችና በጎ ፈቃደኞች የሰብዓዊ እርዳታ ፍላጎቶች እየጨመሩ በሄዱ ቁጥር አስፈላጊውን ድጋፍና ምላሽ መስጠታቸውን አጠናክረው እንደሚቀጥሉ ገልጸዋል።