ኪንታሮትን ሊያድን የሚችል መድሃኒት ምንድነው?

በቆዳ ላይ የሚወጡ የኪንታሮት እድገቶች በብዙ ሰዎች ዘንድ የተለመዱና ለተለያዩ ህመሞች እንዲሁም ለእይታ መዛባት የሚዳርጉ የጤና ችግሮች ናቸው። ኪንታሮት በቫይረስ (Human Papillomavirus - HPV) አማካኝነት የሚከሰት የቆዳ ህመም በመሆኑ፣ በዘፈቀደ ወይም ባልተረጋገጡ አሰራሮች ከመታከም ይልቅ በሳይንስ የታመነባቸውን እና የሕክምና ባለሙያዎች የሚጠቁሟቸውን መድኃኒቶች መጠቀም ተመራጭ እንደሆነ የቆዳ ሕክምና ባለሙያዎች ያሳስባሉ።   የኪንታሮት ሕክምናዎች በዋናነት የታመመውን የቆዳ ክፍል በማስወገድ እና የሰውነትን በሽታ የመከላከል አቅም በማጠናከር ላይ ያተኮሩ ናቸው። ሳሊሲሊክ አሲድ በፈሳሽ፣ በቅባት ወይም በፕላስተር መልክ የሚዘጋጅ ሲሆን፣ ያለ ሕክምና ማዘዣም ሊገኝ የሚችል ዋነኛ መድኃኒት ነው። ይህ መድኃኒት በኪንታሮቱ ላይ በተደጋጋሚ በሚቀባበት ጊዜ የተጎዳውን የቆዳ ሕዋስ በሂደት እያሟሟ እና እያላጠ በማስወገድ ረገድ ከፍተኛ ውጤት ያሳያል። በተጨማሪም ካንታሪዲን የተባለው በቆዳ ሕክምና ባለሙያዎች በቀጥታ በኪንታሮቱ ላይ የሚቀባ መድኃኒት ከኪንታሮቱ ስር አረፋ እንዲፈጠር በማድረግ የሞተው የኪንታሮት ክፍል ተልጦ እንዲወድቅ ያደርጋል። ከዚህም ውጭ የሰውነትን የነጭ ደም ሕዋሳት በመቀስቀስ ቫይረሱን በራስ አቅም እንዲታገል የሚያደርግ እና የኪንታሮት እድገትን የሚያቆም ኢሚኪሞድ የተባለ የቆዳ ቅባት ጥቅም ላይ ይውላል።   መድኃኒቶች ብቻቸውን በቂ ካልሆኑ የቆዳ ሕክምና ልዩ ባለሙያዎች ዘመናዊ ዘዴዎችን ይጠቀማሉ። ፈሳሽ ናይትሮጅን በመጠቀም ኪንታሮቱን በማቀዝቀዝ እና ቲሹዎቹ እንዲሞቱ በማድረግ በሳምንታት ውስጥ እንዲረግፍ የሚያደርግ በበረዶ ማቃጠል ሕክምና ይከናወናል። እንዲሁም የኤሌክትሪክ ሞገድ ወይም የሌዘር ብርሃን በመጠቀም ወደ ኪንታሮቱ የሚሄዱ የደም ስሮችን በማቃጠል እድገቱን ማቆም እና ማስወገድ ይቻላል።   ኪንታሮት ተላላፊ ቫይረስ በመሆኑ በቤት ውስጥ በሹል ነገሮች ለመቁረጥ፣ ለመቧጨር ወይም ያልተረጋገጡ አሲዳማ የዕፅዋት ፈሳሾችን (እንደ ጥሬ የፓፓያ ወተት ያሉ) ለመቀባት መሞከር ቫይረሱ ወደ ሌሎች የሰውነት ክፍሎች እንዲሰራጭ እና ለከፋ የኬሚካል መቃጠል እንዲዳርግ ያደርጋል። በመሆኑም በተለይ በፊት መልክ፣ በብልት እና በሌሎች ስሱ ቦታዎች ላይ የሚወጡ ኪንታሮቶችን ለማከም የቆዳ ሕክምና ባለሙያ ማማከር አስፈላጊ ነው ተብሏል።