የፌዴራል ጠቅላይ ፍርድ ቤት ሰበር ሰሚ ችሎት የዳኝነት አገልግሎት ሙሉ በሙሉ ወደ ዲጂታል አሰራር መሸጋገሩ ተገለጸ

የፌዴራል ጠቅላይ ፍርድ ቤት የሰበር ሰሚ ችሎት የዳኝነት አገልግሎት አሰጣጥ ሂደት ከዛሬ ጥቅምት 3 ቀን 2019 ዓ/ም ጀምሮ ሙሉ በሙሉ ወደ ዲጂታል አሰራር መሸጋገሩን አስታውቋል። አሐዱ ሬዲዮ ከጠቅላይ ፍርድ ቤቱ ያገኘው መረጃ እንደሚጠቁመው የዳኝነት አገልግሎት አሰጣጡን ቀልጣፋ ፣ ተደራሽ ፣ ግልጽ እና ወጪ ቆጣቢ ለማድረግ ያለመ "ሚዛንኢት" የተሰኘ የተቀናጀ የፍርድ ቤት ጉዳዮች መረጃ አስተዳደር ስርዓት ተዘርግቶ ወደ ስራ ገብቷል። የዚሁ ስርዓት የሙከራ ትግበራ በተሳካ ሁኔታ መጠናቀቁን ተከትሎ በሰበር ሰሚ ችሎት ደረጃ የሚካሄዱ የዳኝነት አገልግሎቶች ከጅምር እስከ ፍጻሜያቸው ሙሉ በሙሉ በዚሁ ዲጂታል ስርዓት መከናወን መጀመራቸው ተገልጿል። በዚህም መሰረት በሰበር ሰሚ ችሎት አዲስ መዝገብ መክፈት የሚፈልጉ ተገልጋዮች ወደ ፍርድ ቤት በአካል መምጣት ሳያስፈልጋቸው ባሉበት ሆነው በዲጂታል ስርዓቱ አማካኝነት መዝገባቸውን መክፈት እንደሚችሉ ተመላክቷል። በመታየት ላይ ባሉ ነባር መዝገቦች ላይ አገልግሎቱን ማግኘት የሚፈልጉ ተገልጋዮች መዝገቦቻቸውን ከፋይዳ ጋር ማስተሳሰር የሚኖርባቸው ሲሆን ይህንንም በመደበኛ የስራ ሰዓት በጠቅላይ ፍርድ ቤት በአካል በመገኘት ማከናወን ይችላሉ ተብሏል። አዲሱ "ሚዛንኢት" የተሰኘው ስርዓት ፍትህ የመጠየቅና የማግኘት ሂደቱን ዘመናዊ ፣ ፈጣን እና ለተገልጋዮች ምቹ የሚያደርግ እንደሆነ ተገልጿል።